VIÑETAS 2017, A CONFIRMACIÓN DA BANDA DESEÑADA COMA UNHA FERRAMENTA IMPRESCINDIBLE PARA ENTENDERMOS O MUNDO

2017-08-14T09:50:30+02:00
  • Aínda que as actividades paralelas rematan hoxe domingo, as exposicións do XX Salón Internacional do Cómic poderanse visitar ata o 11 de setembro
  • Miguelanxo Prado: “A vixésima edición foi, coma cómpre, unha celebración; unha festa de aniversario na que quixemos ter connosco a todos os que foron fundamentais para Viñetas nestas dúas décadas; os autores consagrados, galegos e de fóra”
  • Unha mostra colectiva dos traballos do alumnado d’O Garaxe Hermético (12 horas, Rúa da BD), pon o punto final a sete días de charlas, conferencias, sinaturas e presentacións editoriais

A Coruña, domingo 13 de agosto de 2017Viñetas 2017 é unha festa de aniversario. Unha celebración por todo o alto, non só dos vinte anos que cumpre o Salón Internacional do Cómic que promove o Concello da Coruña, senón da propia evolución que experimentou nestas dúas décadas a banda deseñada, a galega e a española. “Nestes vinte anos de Viñetas desde o Atlántico –explica  Miguelanxo Prado, o seu director–, tivemos a sorte de asistir, e mesmo de participar no que cabe, na conquista da madurez por parte desta linguaxe universal que é o Cómic, igual que puidemos vivir a apertura de todas as vías posibles para o desenvolvemento das múltiples opcións creativas que a Banda Deseñada ofrece”. Aí está, como exemplo, o espectáculo audiovisual The Black Dog, os soños de Paul Nash que, a cargo do polifacético Dave McKean, abriu o luns 7 de agosto a programación de actos paralelos deste Salón.

Viñetas ten conseguido establecer co público do Festival” –engade Miguelanxo Prado- “unha relación que vai alén desa nostalxia da infancia perdida que hai anos podía suscitar o cómic, o que sempre foi, xustamente, o noso obxectivo, logo razón de máis para estarmos de festa”.

O programa desta vixésima edición é, na opinión do seu máximo responsable, o exemplo perfecto desa maioría de idade acadada polo Cómic e, asemade, da súa evolución creativa. “As dúas exposición colectivas (A banda deseñada galega nos vinte anos de Viñetas eDez anos de Premios Nacionais) son unha clara demostración da calidade e mais a importancia dos nosos creadores. Reflicten tamén cal foi o noso punto de partida á hora de estruturar os contidos desta vixésima edición do Festival: unha exaltación do que fomos conseguindo para a Historieta nestas dúas décadas”.

“Máis alá da excepcional programación que tivemos este ano co gallo de celebrar o vixésimo aniversario de Viñetas, estamos especialmente satisfeitos –remata Miguelanxo Prado– da incorporación ao Salón da Fundación Barrié e mais Afundación, así como da grande achega que fixeron, tanto a Concellaría de Cultura como a Deputación, para conseguirmos esa meta común que tiñamos todos: facer unha vez máis da Coruña o epicentro do Cómic, a súa cerna, durante estes sete días de agosto”.

Rúa da BD – exposicións

O XX Salón Internacional do Cómic pecha hoxe, domingo 13, a súa tradicional axenda de actividades paralelas. Unha presentación colectiva das obras do alumnado d’O Garaxe Hermético, a escola de cómic que dirixe Kiko da Silva en Pontevedra, porá a mediodía o punto e final a esta semana de charlas, conferencias, sinaturas de orixinais e presentación de novidades editoriais.

A Rúa da BD, isto é, a feira editorial que se celebrou en paralelo ao propio Festival, tamén fecha esta noite as súas portas.

Porén, todas as exposicións que conforman a edición número vinte permanecerán ata o día 11 de setembro nas respectivas sedes do Salón. Poderán ser visitadas ata esa data no horario habitual.

VIÑETAS 2017, A CONFIRMACIÓN DA BANDA DESEÑADA COMA UNHA FERRAMENTA IMPRESCINDIBLE PARA ENTENDERMOS O MUNDO2017-08-14T09:50:30+02:00

Sesións de firmas oficiais en Viñetas desde o Atlántico 2017

2017-08-11T14:17:33+02:00

Chega un momento moi esperado! Xa coñecemos os horarios das sesións de firmas oficiais que se celebrarán na edición 2017 de Viñetas desde o Atlántico!

Este ano, a diferenza das pasadas entregas do Festival Internacional da Historieta da Coruña, as sesións de firmas celebraranse simultáneamente no Kiosco Alfonso e na sala municipal de exposicións PALEXCO. Como xa sabedes, nesta edición 2017 cúmprense 20 anos de Viñetas desde o Atlántico. Unha sinalada data que celebraremos recibindo cos brazos abertos a un bo número de autores, que farán as delicias dos asistentes. Así, por cuestións loxísticas, co obxectivo de que tanto profesionais como visitantes gocen de Viñetas da forma máis cómoda posible, a organización do festival decidiu habilitar ambos espazos para as sesións de firmas oficiais, cuxas datas e horarios pasamos a detallar a continuación:

  • Venres 11 de agosto, de 18:00 a 20:00 horas, en Kiosco Alfonso e PALEXCO.
  • Sábado 12 de agosto, de 12:00 a 14:00 horas, en Kiosco Alfonso e PALEXCO.

A distribución dos autores en cada espazo é a seguinte:

Aproveitamos para recordar algunhas normas básicas, xa tradicionais, destas sesións oficiais de firmas:

  • Os autores asinarán e debuxarán únicamente en exemplares das súas obras e no catálogo oficial de Viñetas 2017, a non ser que indiquen expresamente o contrario.
  • O público asistente deberá formar unha fila ordenada á entrada de cada recinto.
  • Á hora indicada abriranse as portas de cada recinto. En cada entrada estarán indicados os lugares exactos de cada edificio nos que se realizarán as firmas.
  • Unha vez dentro do recinto, o público interesado deberá formar unha fila ordenada en cada posición, na mesa do autor cuxa asina desexe obter.
  • As sesións de firmas terminarán ás horas previstas, de maneira que as filas pecharanse uns minutos antes, para evitar aglomeraciones e confusións.

Trátase dunhas normas básicas que teñen como único obxectivo evitar malentendidos e que todo o mundo que o desexe poida levarse un recordo do seu autor favorito.

Sesións de firmas oficiais en Viñetas desde o Atlántico 20172017-08-11T14:17:33+02:00

Dúas sedes máis na cidade, Afundación e a Fundación Barrié

2017-07-09T17:38:05+02:00

Viñetas engade dúas novas sedes nesta vixésima ocasión: Afundación, da Obra Social Abanca, e a Fundación Barrié. Todos os espazos expositivos do centro neurálxico da cidade quedan, daquela, ao dispor do Salón.

Afundación, acollerá a mostra sobre “A banda deseñada galega nos vinte anos de Viñetas”. Ademais, na súa sala de conferencias desenvolveranse as charlas cos Premios Nacionais de Cómic que virán ao Salón e tamén co autor Eduardo Risso e o guionista Abulí.

A Fundación Barrié, pola súa banda, conterá a exhibición dedicada a eses “Dez anos de Premio Nacional de Cómic”. Será alí tamén onde terá lugar o espectáculo de Dave McKean, o día 7 de agosto. 

A Torre de Hércules encargarase, unha edición máis, de amosar os carteis que se fixeron para Viñetas desde o Atlántico. Tedes máis detalles sobre as diferentes sedes na sección Exposicións.

Este XX Viñetas desde o Atlántico vén asemade cunha renovada carpa para actividades; un espazo emprazado no medio e medio da feira de historieta que adoita concentrar en cada edición a moito amante do cómic. Alí terán lugar, igual ca adoito, as actividades paralelas que capitanea Xosé Tomás, cos obradoiros como eido central. Servirá, ademais, para acoller as charlas editoriais sobre os debuxantes e guionistas presentes na edición 2017 ou as propias sinaturas de exemplares e presentación das novas novelas gráficas deses autores que, polo xeral, programan as empresas editoras.

Dúas sedes máis na cidade, Afundación e a Fundación Barrié2017-07-09T17:38:05+02:00

Música e banda deseñada: “Black Dog, the dreams of Paul Nash” de Dave McKean

2017-07-09T17:24:24+02:00

Outra das innovacións que traerá a edición número vinte do Viñetas desde o Atlántico será a programación dun espectáculo audiovisual co cómic como protagonista. Trátase do “Black Dog, the dreams of Paul Nash” de Dave McKean, unha sesión de música en vivo con proxección das imaxes que ilustran a novela gráfica que publicou McKean ao redor do británico Paul Nash, un dos nomes claves no nacemento dos movementos modernista e surrealista. Terá lugar o propio día da inauguración, luns 7 de agosto, na Fundación Barrié, unha das novas sedes desta edición.

O acceso ao espectáculo será mediante invitación. Darémosvos máis detalles sobre o proceso para acceder ao espectáculo en canto sexa posible, a través das canles oficiais de Viñetas desde o Atlántico.

Mesmo así, as ilustracións que compoñen a obra do polifacético McKean inspirada en Nash, si se poderán visitar durante todo Viñetas, no Kiosco Alfonso.

Música e banda deseñada: “Black Dog, the dreams of Paul Nash” de Dave McKean2017-07-09T17:24:24+02:00

Exposición “A banda deseñada galega nos vinte anos de Viñetas”

2017-07-09T17:24:03+02:00

O Salón Internacional de Cómic auspiciado polo Concello hai dúas décadas, abrirá as súas portas o vindeiro 7 de agosto cunha homenaxe polo miúdo aos sobranceiros que foron pasando polo Kiosco Alfonso e mais esoutras salas que acollen sempre o festival. Incluída a vella Autoridade Portuaria, a primeira sede que tivo Viñetas ata que foi demolida en 2002. “A banda deseñada galega nos vinte anos de Viñetas” será tamén unha exposición novidosa, conceptualmente falando.

Por primeira vez, o público que asista este verán ao Salón coruñés do Cómic terá de diante unha mostra retrospectiva-comparativa da evolución deses galegos que recalaron na cidade nestes anos.

Son nomes imprescindibles da escena actual da banda deseñada galega. En concreto:

  • Fran Jaraba (División azul, Edicions De Ponent)
  • Fernando Iglesias (Impresiones de la isla, Editorial Retranca)
  • Xaquín Marín (As dúas viaxes de Xaquín Marín, El Patito Editorial)
  • DasPastoras (La casta de los Metabarones. CASTAKA, Norma Editorial)
  • Fran Bueno (Graveyard Shift, Editorial Glénat – Francia)
  • Alex Cal (G.I.Joe, IDW – EE.UU.)
  • Emma Ríos (Bella Muerte, Astiberri Ediciones)
  • Víctor Rivas (The Loch Ness Monster (Behind the Legend), Little Bee Books – EE.UU)
  • David Rubín (Ether. La muerte de la última Llama Dorada, Astiberri Ediciones)
  • José Domingo (Aventuras de un oficinista japonés, Astiberri Ediciones)
  • Fausto Isorna (O misterioso guía da Fundación Camilo José Cela, El Patito Editorial)
  • Jano (Nacho Camacho, Demo Editorial)
  • Martín Romero (Episodios lunares, Reino de Cordelia)
  • Ramón Marcos (Vida de Madre, El Patito Editorial)

A exposición “Dez anos de Premios Nacionais” estará ubicada en Afundación, da Obra Social Abanca, unha das novas sedes desta edición 2017 de Viñetas desde o Atlántico. Tedes máis detalles na sección Exposicións.

Exposición “A banda deseñada galega nos vinte anos de Viñetas”2017-07-09T17:24:03+02:00

Exposición “Dez anos de Premios Nacionais”.

2017-07-09T17:23:40+02:00

2017 é un ano especial para a novena arte mesmo en termos xerais: cúmprense tamén dez anos da existencia dos Premios Nacionais de Cómic que outorga o Ministerio de Cultura. É o motivo de que Viñetas se sume á festa e ofreza a exposición “Dez anos de Premios Nacionais”. Aí estarán dende as páxinas do primeiro agasallado, Max, en 2007, ata as do último premiado polo de agora, Pablo Auladell (2016). Os Premios Nacionais que virán a Viñetas son:

  • Juanjo Guarnido (Blacksad – Amarillo, Norma Editorial)
  • Antonio Altarriba (El arte de volar, Edicions De Ponent/ Norma Editorial)
  • Juan Díaz Canales (Blacksad – Amarillo, Norma Editorial)
  • Santiago Valenzuela (Plaza Elíptica, Edicions De Ponent)
  • Alfonso Zapico (Dublinés, Astiberri Ediciones)
  • Pablo Auladell (El paraíso perdido, Sexto piso)
  • E o propio Miguelanxo Prado, director de Viñetas (Ardalén, Norma Editorial)

A exposición “Dez anos de Premios Nacionais” estará ubicada na Fundación Barrié, unha das novas sedes desta edición 2017 de Viñetas desde o Atlántico. Tedes máis detalles na sección Exposicións.

Exposición “Dez anos de Premios Nacionais”.2017-07-09T17:23:40+02:00

Benvidos a Viñetas 2017!

2017-07-07T10:32:00+02:00

Por vixésimo ano consecutivo, A Coruña volverá converterse na capital do cómic da man do festival Viñetas desde o Atlántico, que se celebrará entre os días 7 e 13 de agosto de 2017.

Como é tradición, neste espazo web manterémosvos informados puntualmente de todas as novidades de Viñetas 2017. É un bo momento para recordar tamén a nosa presenza en redes sociais, nas que daremos a coñecer o día a día desta imprescindible cita. Síguenos en Facebook, Twitter e Instagram!

Na portada da web tedes todos os detalles sobre os invitados desta edición, sobre os que falaremos con máis detalle nos próximos días. ¡Un gran elenco formado por Bruno Chevrier – Nob, Cameron Stewart, Eduardo Risso, Julie Rocheleau, Kiko Da Silva, Natacha Bustos, Pablo Auladell, Ralph Meyer, Rayco Pulido, Javi Rey, Dave Mckean, e Enrique Sánchez Abulí!

Así mesmo, na sección exposicións xa podedes consultar a ubicación exacta das mostras de Viñetas 2017.

Para rematar, non podemos esquecernos da nosa sección histórica, con información sobre as edicións previas de Viñetas desde o Atlántico. Como novidade, este ano incorporamos o listado de todos os autores invitados de cada edición.

Contamos co voso apoio! Esperámosvos!

Benvidos a Viñetas 2017!2017-07-07T10:32:00+02:00
Go to Top