CONVIDADOS
ALICIA JARABA
Exposición:
SALA DE EXPOSICIONES PALEXCO
Charla:
Martes 9 – 18.15h
Alicia Jaraba Abellán (Vigo, 1988)
Licenciada en Filoloxía Hispánica e Francesa, comezou a traballar como debuxante de cómics en 2017, publicando en Francia dous libros da serie Les détectives du surnaturel con guión de N. M. Zimmermann, e posteriormente a novela gráfica en dous tomos L’onde Dolto, con guión de Séverine Vidal.
No noso país deuse a coñecer da man da antoloxía O puño e a letra, onde corenta autores adaptaban poemas de Yolanda Castaño no que se considera o primeiro libro de comic poetry, diálogo entre poesía e cómic, da historieta galega.
Este ano debuta como autora completa con Soy la Malinche, unha novela gráfica, onde mestura as súas dúas grandes afeccións: o cómic e os idiomas.
Ambientada no século XVI, Soy la Malinche relata a historia de Malinalli, filla dun xefe de clan centroamericano. Pouco despois da morte do seu pai é vendida a un clan maia para traballar no campo e satisfacer a libido do seu novo amo. Un día, enormes barcos aparecen no horizonte… son os españois, comandados por Hernán Cortés. Grazas ao seu coñecemento de varias linguas e relixión, aos seus dezaoito anos esta moza acabará por se converter na Malinche, a intérprete dos conquistadores e amante de Cortés. Será tamén ela quen terá a coraxe de dicir unha palabra prohibida ás mulleres do seu tempo: non! Alén da lenda, aquí está a historia da Malinche, viva, nova, inexperta, moitas veces superada polos acontecementos, mais, sobre todo, humana.
2018 – O puño e a letra (Edicións Xerais)
2022 – Soy La Malinche (Nuevo Nueve)
BORJA GONZÁLEZ
Exposición:
SALA DE EXPOSICIONES PALEXCO
Charla:
Martes 9 – 19.30h
Borja González (Badajoz, 1982)
Ilustrador e historietista de formación autodidacta, fixo os seus primeiros primeiros pasos en fanzines como El Hombre Alto, Roland, Las aventuras de John Gummo e Teresa.
Tamén publicou en revistas e xornais, como GQ, Rockdelux ou Ara, e expuxo os seus orixinais en galerías de España e Francia.
Entre 2012 e 2013 colaborou en cómics de varios autores, como o Apocalipsis según San Juan editado por EDT, e Putokrío obra de De Ponet.
En 2012, ademais, publicou a súa primeira obra en solitario, un cómic coeditado por ERE e Dadá Ediciones baixo o título La boca del lobo, unha biografía ficticia do pintor pacense Antonio Juez e Carolina Coronado. Ao ano seguinte, adaptou o poema de Goethe El Rey de los Elfos para El verano del cohete, editorial que el dirixía xunto a Mayte Alvarado e Rui Díaz.
De entre as súas obras breves, destacan Panorama esperanzador (2015), La Reina Orquídea (2016) e Menneval(2018), aínda que a súa confirmación tivo lugar como autor das novelas gráficas. A primeira delas, The Black Holes(2018). A falta de rostros nos personaxes, o aire poético, ás veces estraño e, sobre todo, un extraordinario dominio do que non se mostra na historia, converteron a Borja González nun dos autores de referencia entre os novos creadores da historieta española.
Se The Black Holes chamou poderosamente a atención de crítica e público, a súa seguinte obra, Grito nocturno(2021), non fixo máis que confirmar o seu talento e cumprir con suceso as expectativas postas nel converténdose nun éxito desde a súa publicación.
Actualmente, ademais do seu traballo como historietista, dirixe, xunto a Mayte Alvarado, o proxecto Spiderland/Snake, dedicado á difusión de fanzines e cómics en liña onde se pode ler a súa obra The Unseen Records.
2015 – Panorama esperanzador (El verano del cohete)
2016 – La reina orquídea (El verano del cohete)
2018 – Menneval (Spiderland/Snake)
2018 – The Black Holes (Reservoir Books)
2021 – Grito Nocturno (Reservoir Books)
DANI BERMÚDEZ · FIDEL DE TOVAR
Exposición:
SALA DE EXPOSICIONES PALEXCO
Charla:
Mércores 10 – 18.15h
Dani Bermúdez (Barcelona, 1981)
Fidel De Tovar (Barcelona, 1982)
Formado en narración no Ateneo de escritura de Barcelona e en fotografía documental no CFD, a fascinación de Fidel de Tovar pola cultura nipoa lévalle a realizar en 2013 a fotoreportaxe Hanami sobre a floración da cerdeira en Xapón, co que gaña o premio ao mellor documental de revista Piel de Foto e que publica tamén na revista sobre tendencias xaponesas Eikyô (2014). En 2016 crea o guión de Arashiyama, la montaña de los deseos e, xunto ao debuxante Dani Bermúdez, gaña o XI concurso manga de Norma Editorial. A obra publícase en 2017 e gaña o premio a mellor manga español nos Rameneos 2018 do portal líder en actualidade anime e manga Ramen para dos e álzase co premio homónimo no festival Manga Barcelona.
Pola súa banda, Dani Bermúdez, é un amante do idioma e a cultura xaponesa, moi influenciado polo cinema e os videoxogos, que estudou Belas Artes na escola Llotja e Ilustración na escola Joso. En 2005 publica a súa primeira serie manga Onegai Señorita na revista Line Magazine. Participou en dúas obras colectivas, ambas as dúas publicadas por Letrablanka Editorial: Let’s Cook! (2012) e Olympics (2013). En 2017 publica Arashiyama, la montaña de los deseos, obra gañadora do concurso manga de Norma Editorial, e a súa primeira obra como debuxante único e xunto a Fidel De Tovar (guionista). En 2018, Bermúdez recibiu o premio ao mellor mangaka español no Héroes manga Madrid por esta mesma obra.
Desde que comezan a traballar xuntos convértense nun tándem creativo moi activo que, ademais de amosar o proceso de creación das súas obras en directo en Twitch, tamén traducen, maquetan e deseñan obras para varias editoriais.
Arashiyama, a súa primeira obra conxunta, xoga con elementos fantásticos tomando como punto de partida unha antiga lenda que conta que se se consegue chegar á cima de Arashiyama á noitiña do cuarto día de lúa chea do ano, os deuses concederán a quen o consiga, un desexo. Por iso os pequenos Shin e Sumie escápanse de casa da súa avoa para ir a “a montaña dos desexos” e pedir aos deuses que fagan volver aos seus pais da súa “longa viaxe polo ceo”. O que non se imaxinan é que en Arashiyama agardan algo máis que deuses.
No ano 2020 publícase unha nova edición ampliada con máis páxinas en cor e información adicional sobre o universo da obra.
Liquid Memories, o seu seguinte manga, esta vez en dous volumes, supuxo un cambio de rexistro con respecto a Arashiyama. Do fantástico de corte familiar, pasaban a un thriller ambientado no Londres actual, onde unha serie de violentos asasinatos sacode a tranquilidade dos habitantes da cidade. O nexo común, ao parecer, é que todos os crimes teñen algo en común: a auga.
Con esta obra gañaron en 2019 o premio ao mellor manga español no festival Manga Barcelona, converténdose nos primeiros autores en alzarse con este premio dous anos consecutivos e con dúas obras diferentes.
O seu último traballo, El tiempo de los tres, é unha historia de corte máis íntimo. A Sagrada Familia derrubouse e, con ela, algo rachou no interior da ceramista Elda, que voa de volta desde Kobe a Barcelona para reconciliarse cun pasado doloroso. E é entón, nas rúas de Barcelona, onde rememora a súa vida nos 90 xunto a Jules e Hiroshi, os seus compañeiros de piso da época, tentando pechar unha ferida que leva demasiado tempo aberta.
2017 – Arashiyama (Norma Editorial)
2019 – Liquid Memories. 2 volúmenes (Norma Editorial)
2021 – El tiempo de los tres (Norma Editorial)
DAVID RUBÍN
Exposición:
KIOSKO ALFONSO
Charla:
Xoves 11 – 19.30h
David Rubín (Ourense, 1977)
Tras estudar deseño gráfico, lánzase ao mundo do cómic, a animación e a ilustración. Nos primeiros 2000 comeza a publicar, converténdose nun dos integrantes fundamentais do colectivo Polaqia con presenza obrigada na súa publicación Barsowia así como na revista infantil Golfiño editada por La Voz de Galicia ou na revista Dos veces breve.
Coa súa primeira obra longa, El circo del desaliento, é nomeado como autor revelación no Salón Internacional do Cómic de Barcelona de 2006, gaña o primeiro premio Castelao con Onde ninguén pode chegar, e edítase en galego, castelán, italiano e francés. A súa seguinte novela gráfica, O salón de té do oso malaio, publicada en 2006, edítase tamén en Francia, Italia e a República Checa, e leva catro nomeamentos aos premios do Salón Internacional do Cómic de Barcelona 2007, logra o galardón ao autor revelación e acredítalle como finalista do I Premio Nacional do Cómic.
Posteriormente Cuaderno de tormentas, editado por Planeta en 2008, é nomeado ao mellor debuxo de novo na cita de Barcelona. Codirixe Espíritu del bosque, unha longametraxe de animación CGI, e o mesmo ano adapta ao cómic Romeo y Julieta, de William Shakespeare, e, ao ano seguinte El monte de las ánimas, de Gustavo Adolfo Bécquer, ambas as dúas para a editorial SM.
No ano 2010 mergúllase na actualización en cómic do mito de Heracles cos dous tomos de El Héroe que verán a luz entre 2011 e 2012.
Rubín ten unha actividade incesante e, a continuación, ocúpase consecutivamente dunha adaptación do poema épico Beowulf, en colaboración con Santiago García, dous spin offs de Battling Boy, de Paul Pope, centrados no personaxe de Aurora West, dos que se publicaron dous tomos: El momento de Aurora West e La caída de la casa West por Debolsillo en 2014 e 2015, así como La ficción, xunto co guionista Curt Pires, editado por Astiberri, e Miguel en Cervantes. El retablo de las maravillas, realizado con Miguelanxo Prado e coeditado por Astiberri e Acción Cultural Española en 2015.
En 2016 realiza xunto a Marcos Prior a novela gráfica Gran Hotel Abismo á vez que comeza en Ether, xunto a Matt Kindt. Posteriormente realizará un dos arcos da serie Rumble, con guión de John Arcudi, na que o Rubín recolle o testemuño de James Harren, encargado de debuxar os tres primeiros tomos. Mentres, segue traballando en varios episodios da serie Black Hammer, serie publicada pola editorial Dark Horse, con guións de Jeff Lemire.
Ese mesmo ano é nomeado a catro premios Eisner en catro categorías diferentes: a mellor debuxante/entintador, mellor adaptación doutro medio, mellor cor e á mellor serie de continuidade.
Estes últimos anos seguiu desenvolvendo unha actividade continua no mercado norteamericano. Desde encargarse do tramo final da serie Rumble, con guión de John Arcudi, ata a novela gráfica Cosmic Detective, de inminente saída, realizada xunto a Jeff Lemire e Matt Kindt. Ademais, colaborou, entre outros, no Detective Comics 1000 ou Black Hammer Street of Spiral, e ten realizado multitude de portadas.
Actualmente está a rematar El fuego, obra que publicará Astiberri Ediciones a finais deste mesmo ano.
2005 – El circo del desaliento (Astiberri Ediciones)
2011 – El héroe. 2 volúmenes (Astiberri Ediciones)
2013 – Beowulf (Astiberri Ediciones)
2014 – Battling Boy. 2 volúmenes (Penguin Random House)
2016 – Gran Hotel Abismo (Astiberri Ediciones)
2017 – Ether (Astiberri Ediciones)
2018 – Black Hammer 2 (Astiberri Ediciones)
2018 – Cuaderno de tormentas edición ampliada (Astiberri Ediciones)
2018 – Sherlock Frankenstein y La legión del mal (Astiberri Ediciones)
2019 – Rumble. Volúmenes 4 a 6 (Astiberri Ediciones)
2019 – O salón de té do oso malaio (Demo Editorial)
EMMA RÍOS
Exposición:
KIOSKO ALFONSO
Charla:
Xoves 11 – 19.30h
Emma Ríos (Vilagarcía de Arousa, 1976)
Licenciada en Arquitectura, na Universidade da Coruña, comezou debuxando e editando os seus propios fanzines en Ourense, influída tanto polos comic books americanos como polos mangas procedentes de Xapón. Eses primeiros traballos verían a luz no fanzine APB, A prueba de balas, dentro do colectivo Polaqia.
Tras demostrar os seus dotes para a narrativa gráfica, probou sorte no mercado norteamericano, debuxando a miniserie Hexed, e o nacional, creando a adaptación de Amadís de Gaula para a editorial SM, compatibilizando a creación de historietas co traballo nun estudo de arquitectura. Posteriormente entraría directamente a traballar en Marvel Cómics onde debuxou en series como Runaways, Dr. Strange, Firestar, The Amazing Spider-Man, Osborn, Heralds ou Captain Marvel.
Desta etapa na Casa das Ideas destacan especialmente tres traballos: o primeiro, á fronte do segundo volume de Strange, serie dedicada ao Feiticeiro Supremo da Terra, e guionizada por Mark Waid, da que realizaría os catro primeiros números, a reinterpretación da orixe deste mesmo personaxe que fixo xunto ao guionista Greg Pak en Doctor Strange. Primera temporada, e, sobre todo, os seis primeiros números do volume sexto de Captain Marvel, titulado no noso país como Capitana Marvel. Anhelando volar, guionizados por Kelly Sue DeConnick, coa que establecería unha grande amizade que a levaría, en última instancia, a abandonar a famosa editorial para poder crear os seus propios proxectos.
É nesta nova aventura na editorial Image onde Emma Ríos amosa todo o potencial do que xa dera boa conta nos seus traballos en Marvel. Primeiro sería en Bella Muerte, con guións da citada Kelly Sue DeConnick, na que a artista deixaría patentes os seus extraordinarios dotes para a narrativa. Bella Muerte é unha serie que combina de forma maxistral o realismo máxico coa brutalidade do western crepuscular. Esta primeira entrega foi nomeada a varios premios Eisner en 2014: Sue DeConnick como mellor guionista, Emma Ríos por mellor lapis/entintado e mellor portada, e Jordie Bellaire na categoría de mellor cor. En 2015 gañou o Premio á Mellor Obra Internacional no festival de Expocómic e a medalla de bronce no Japan International manga Award.
Autora dunha grande inquietude, a súa seguinte obra, I. D., vería a luz na antoloxía Island Magazine, da que foi co-editora, tamén baixo o paraugas do selo Image, e sería nomeada á Mellor antoloxía nos premios Eisner de 2017. I. D. é unha distopía que analiza o conflito entre percepción e identidade a través da loita de tres persoas que consideran un “transplante de corpo” como a solución ás súas vidas.
En 2016 apareceu a segunda entrega de Bella Muerte, titulada El oso. Unha historia intensa e poética onde a filla dunha muller agonizante fai un pacto cunha das parcas. Aprazar a morte da muller para dar ao seu fillo a oportunidade de volver a casa e despedirse dela. Mais o mozo está nunha trincheira en plena fronte de batalla en Europa. As parcas da Morte e a Fortuna converxen para enfrontarse coa parca da Guerra, que pretende cobrar unha terrible factura. Unha nova entrega que afonda no universo creado por DeConnick e Ríos ampliando a súa mitoloxía.
En 2017 colaborou xunto a oito autoras na colección primavera de Prada que homenaxeaba a autoras de cómic.
O seu seguinte traballo sería no campo do guión, xunto á debuxante Hwei Lim para a que escribiu Mirror. El reflejo de la montaña, que é a primeira entrega dunha serie sobre os alquimistas da Sincronía e os animais conscientes da colonia de Irzah. Un relato que, por riba de calquera outra cousa, explora o concepto de humanidade. Parcialmente inspirada en Oda a Kirihito, de Osamu Tezuka, e A illa do Dr. Moreau, de H. G. Wells, Mirror é unha historia sobre a identidade, a aceptación e a liberdade de elixir.
A terceira entrega de Bella Muerte, titulada La rata, chegaría en 2019 repartida en cinco entregas, publicándose recompilada ao ano seguinte en España.
Desde entón, a súa actividade centrouse máis na realización de historias curtas, entre as que cabe destacar as súas colaboracións no primeiro número da nova colección Batman Black and White, titulada Sísifo; La cosa del pantano: Cuentos de la ciénaga con guión de Vita Ayala; Marvel Divas ou no
Villanos de Gotham Especial Aniversario, cunha historia de G. Willow Wilson sobre Poison Ivy que introducía a súa nova serie.
Ademais do seu labor como historietista, nos últimos anos destacou tamén na súa faceta como ilustradora, colaborando, entre outros, con Wizards of the Coast para Magic The Gathering, ou Edicións Gigamesh, como autora das portadas das novas edicións de Bosque Mitago y Lavondyss de Robert Holdstock; obtendo polo seu traballo en Bella Muerte. La rata, o prestixioso premio Eisner en 2020 á mellor autora de portadas.
2009 – Hexed, la marca de Lucifer (El Patito Editorial)
2010 – Extraño (Panini España)
2013 – Capitana Marvel, Anhelando volar (Panini España)
2013 – Prophet. Número 1 (Aleta Ediciones)
2013 – Doctor Extraño. Primera Temporada (Panini España)
2014 – Bella muerte. 3 volúmenes (Astiberri Ediciones)
2016 – I. D. (Astiberri Ediciones)
2017 – Mirror (Astiberri Ediciones)
2018 – Runaways, Enseñanza en casa (Panini España)
2018 – Marvel Saga. Volúmenes 59, 61, 73 y 83 (Panini España)
2021 – La cosa del pantano: Cuentos de la ciénaga (ECC)
FERNANDO DE FELIPE
Exposición:
KIOSKO ALFONSO
Charla:
Xoves 11 – 18.15h
Fernando de Felipe (Zaragoza, 1965)
Doutor en Belas Artes pola Universidade de Barcelona, é profesor titular da Facultade de Comunicación Blanquerna, onde dirixe desde 2006 o Máster Oficial en Cinema e TV da Universitat Ramon Llull. Como ensaísta, é autor de títulos como Joel y Ethan Coen: El cine siamés (1999), Barton Fink (1999), Adaptación (2008), Ficciones Colaterales(2011), Memento Mori (2012), Cronoendoscopias (2014) ou Cómo construir un buen guión audiovisual (2016), e tamén participou nos volumes colectivos Imágenes para la sospecha (2001), Realidad virtual (2004), El Paraíso de Prometeo (2006), Mad Men (2015), The Horror! (2015), The Wire University (2016), Regreso a Twin Peaks (2017) ou Black Mirror: Porvenir y tecnología (2018).
Desde finais dos anos oitenta e ata finais dos noventa, estivo enteiramente dedicado ao mundo do cómic, publicando a nivel internacional obras como Nacido salvaje (1989) e ADN (1990), ambas as dúas con guión de Óscar Aibar, S.O.U.L. (1991), con guión de Jaime Vane e, desde entón, traballando en solitario, El hombre que ríe (1992), Marketing & Utopía Made in USA (1993), MUSEUM (1994, premio do Salón do Cómic de Barcelona) ou as dúas primeiras partes da triloxía Black Deker: Deep South Story e Yellow Moon (1995-1997). Durante ese período, De Felipe converteuse nun dos autores de referencia no panorama nacional.
Foi tamén realizador e guionista de cinema e televisión (Oedipus, Darkness, Palabras encadenadas, Motel Spaghetti,Toon Toon), director editorial das coleccións Widescreen (Glénat) e (EX)Tensións (Trípodos/URL), e crítico televisivo do diario La Vanguardia.
Tras un hiato de case vinte e cinco anos, en 2021, ECC Edicións, a través da Biblioteca Fernando de Felipe, iniciou a recuperación da totalidade da súa obra achegando, ademais, multitude de material inédito.
1995 – Black Deker. 2 volúmenes (Ediciones Glénat)
1998 – Marketing & Utopía Made in USA (Ediciones Glénat)
1998 – Museum (Ediciones Glénat)
2021 – Nacido salvaje (ECC)
2022 – ADN (ECC)
2022 – S.O.U.L. (ECC)
2022 – El hombre que ríe (ECC)
JESÚS ALONSO IGLESIAS
Exposición:
KIOSKO ALFONSO
Charla:
Mércores 10 – 19.30h
Jesús Alonso Iglesias (Madrid, 1972)
Licenciado en Belas Artes pola Universidade de Madrid na especialidade de Deseño, traballou no campo do deseño, a ilustración e a animación nos estudos Milímetros e Fanciful Arts.
Debutou no cómic en 2010 con Silhouette, con guión de Víctor Santos, un superheroe pulp que protexe París da ocupación nazi durante a segunda Guerra Mundial á marxe da resistencia. Uns considérano un heroe nacional, e outros un terrorista que desestabiliza o delicado equilibrio de poder. Dous anos máis tarde, Alonso Iglesias e Santos volverían a este personaxe en Silhoutte. Arcángeles oscuros, aventura editada, tamén como a primeira, por Dolmen Editorial.
No ano 2013 aparecería o seu primeiro libro como ilustrador: Jesús Alonso Iglesias (Trespuntocero), no que se recompilaban toda clase de bosquexos, explicacións sobre o proceso de ilustración e unha entrevista.
Tras estas primeiras incursións no xénero de aventuras bélico, a súa carreira dá un salto cualitativo con El fantasma de Gaudí (2015), obra con guión de El Torres, que os fixo gañadores do Premio á Mellor Obra no Salón do Cómic de Barcelona 2016 e ser nomeados aos premios Eisner e Harvey en 2018. Nela, Alonso Iglesias demostra o seu enorme talento dando o salto á cor e demostrando que é un autor capaz de manexarse con soltura tanto no cómic de aventuras histórico, como no thriller contemporáneo.
En 2016 presenta PDM. Paquet de Merda, o seu primeiro traballo para o mercado francobelga, unha autobiografía ficcionada do propio guionista da obra, Pierre Paquet, editor da editorial francesa homónima, coprotagonizada polo seu can Fiston, e editado en España por Dibbuks.
Ao ano seguinte, dá un novo xiro á súa carreira con Los Dalton, obra baseada nos inimigos de Lucky Luke. Con guión de Olivier Visonneau e un enfoque realista, Los Dalton conta como os famosos irmáns, perseguidos por todos os corpos de policía do país, deciden fuxir a Arxentina. Pero non sen antes dar un último gran golpe: roubar dous bancos ao mesmo tempo. Os habitantes de Cotteyville, Kansas, recoñecen a dous dos irmáns e, armados ata os dentes, tentarán frustrar o atraco no que se converterá nun baño de sangue.
En paralelo ao seu traballo no mundo historieta, Alonso Iglesias volve á animación onde achegará o seu talento a unha das producións de Marvel máis valoradas dos últimos anos e gañadora do Óscar á mellor película de animación en 2019: Spider-Man, Un nuevo universo. Nela, e nunha primeira fase, participará no deseño de personaxes xunto a outros artistas, coordinados todos por Alberto Mielgo para, posteriormente, levar a cabo o desenvolvemento final dos mesmos xunto a Shiyoon Kim.
2010 – Silhouette (Dolmen Editorial)
2012 – Silhoutte. Arcángeles oscuros (Dolmen Editorial)
2013 – Jesús Alonso Iglesias (Trespuntocero) (Ninth Ediciones)
2015 – El fantasma de Gaudí (Dibbuks)
2016 – PDM (Dibbuks)
2017 – Los Dalton (Dibbuks)
JUAN DÍAZ CANALES
Exposición:
SALA DE EXPOSICIONES PALACIO MUNICIPAL
Charla:
Sábado 13 – 19.30h
Juan Díaz Canales (Madrid, 1972)
Afeccionado desde a infancia aos cómics e aos debuxos animados, formouse nun estudo de animación e foi membro fundador da compañía Tridente Animation. Con todo, a consagración chégalle no campo da historieta. A súa celebridade está vencellada estreitamente á figura do debuxante granadino Juanjo Guarnido, a quen coñeceu no campo da animación e con quen creou a serie Blacksad, un éxito instantáneo de crítica e público desde a súa aparición en 2000 e da que, ata a data, publicáronse seis volumes: Un lugar entre las sombras, Artic Nation, Alma roja; El infierno, El silencio; Amarillo e Todo cae, primeira parte dun díptico no que o famoso detective volve a Nova York, escenario da súa primeira aventura.
Este serie mereceu os máis apaixonados eloxios e os galardóns máis distinguidos, incluíndo o premio á mellor serie no festival de Angoulême, o premio Eisner á mellor edición de material internacional, o premio á mellor obra no Salón de Barcelona e o Premio Nacional do cómic, entre outros.
Ademais da súa colaboración con Guarnido, Díaz Canales traballou xunto a outros debuxantes españois: con Gabor realizou Los patricios (2009) e con José Luis Munuera creou Fraternity (2011).
Posteriormente e, como autor en solitario, asinou a novela gráfica Como viaja el auga (2016), un relato social en clave noir que homenaxeaba, en certa medida, á cidade de Madrid ademais de reflexionar sobre o paso do tempo.
O seu traballo máis popular nos últimos tempos foi a nova encarnación de Corto Maltés, que desenvolve en compañía do debuxante Rubén Pellejero e da que se publicaron ata a data os álbums: Bajo el sol de medianoche,Equatoria e El día de Tarowean. Trátase dun traballo delicado e respectuoso que lle rende homenaxe á obra de Hugo Pratt sen renunciar por iso a imprimirlle un selo persoal.
A súa última obra, Gentlemind, escrita en colaboración con Teresa Valero, e debuxada por Antonio Lapone é un díptico que percorre a historia dunha publicación ficticia do mesmo nome, da súa directora, e dos personaxes claves na súa vida, entre os anos corenta e mediados dos setenta do pasado século
2000 – Blacksad. 6 volumes (Norma Editorial)
2002 – Blacksad Extra. 3 volumes (Norma Editorial)
2011 – Fraternity. Integral (Astiberri Ediciones)
2014 – Blacksad. Integral. 1 (Norma Editorial)
2015 – Corto Maltés. 3 volumes (Norma Editorial)
2016 – Como viaja el agua (Astiberri Ediciones)
2022 – Gentlemind. Integral (Norma Editorial)
JUANJO GUARNIDO
Exposición:
SALA DE EXPOSICIONES PALACIO MUNICIPAL
Charla:
Sábado 13 – 19.30h
Juanjo Guarnido (Granada, 1967)
Formado como debuxante na Facultade de Belas Artes de Granada, cúrtese como historietista colaborando en diversos fanzines e traballando esporadicamente para Cómics Fórum (onde realiza portadas e ilustracións de personaxes Marvel).
A principios dos 90 trasládase a Madrid, onde gaña a vida realizando storyboards para diversas produtoras televisivas. Máis adiante establécese en París, onde comeza a traballar para a división europea de Disney nas súas producións cinematográficas, incluídas as cintas Goofy e hijo, El jorobado de Notre Dame, Hércules, Tarzán, Atlantise El planeta del Tesoro.
En 2000 dá un salto cualitativo na súa carreira co lanzamento do primeiro álbum de Blacksad, escrito polo guionista Juan Díaz Canales (a quen coñecera durante a súa estadía en Madrid). Esta serie —que consta ata o de agora de seis títulos— foi un éxito instantáneo que lles abriu aos seus autores as portas do mercado francés, vendendo centos de milleiros de copias e recollendo multitude de galardóns, como o premio ao autor revelación no Salón de Barcelona, o premio á mellor serie no festival de Angoulême, o premio Eisner ao mellor álbum internacional e o Premio Nacional do Cómic, entre outros.
Ademais desta obra magna, a máis premiada do cómic español das últimas décadas, Guarnido debuxou os tres álbums de que consta a serie Brujeando (2008-2012), escritos pola guionista Teresa Valero.
Presentou o seu seguinte traballo en 2019, xunto ao guionista francés Alain Ayroles. Trátase de El Buscón en Las Indias, unha homenaxe á inmortal creación de Quevedo, que retoma as desventuras do famoso pícaro alí onde a novela as deixou en suspenso.
O seu último traballo é o sexto álbum da serie Blacksad. Realizado, como os anteriores, xunto a Juan Díaz Canales, Todo cae é a primeira parte dun díptico, no que John Blacksad volve a Nova York, escenario da súa primeira aventura.
2000 – Blacksad. 6 volumes (Norma Editorial)
2002 – Blacksad. Extra. 3 volumes (Norma Editorial)
2014 – Blacksad. Integral. 1 (Norma Editorial)
2019 – El Buscón en Las Indias (Norma Editorial)
2021 – Brujeando. Integral (Astronave)
*foto de Rita Scaglia
MAYTE ALVARADO
Exposición:
SALA DE EXPOSICIONES PALEXCO
Charla:
Martes 9 – 19.30h
Mayte Alvarado (Badajoz, 1978)
Autora de cómics e ilustradora, publicou o conto ilustrado Miss Marjorie (2013), o cómic colectivo Fantasmas (2014) e os cómics E-19 (2015), Descalzos.
Los doce apóstoles de México (2018), El lago (2018) e, en colaboración con Borja González, o díptico Jardín/Una caja vacía (2019).
Ilustrou libros como La casa de Bernarda Alba (2017) e Escrito al margen: anecdotario indiscreto de la vida literaria(2019) e, ademais, colaborou en medios como GQ ou Ara.
En 2018, coa obra Descalzos. Los doce apóstoles de México, encarga do Centro Estremeño de Estudos e Colaboración con Iberoamérica, onde relata a viaxe que en 1524, partindo do porto de Sanlúcar de Barrameda, fixeron un grupo de frades franciscanos coa misión, encomendada pola Coroa española e a Igrexa católica de evanxelizar o Novo Mundo, deixa máis que patente a súa enorme madurez gráfica, a súa destreza no manexo dos silencios, cultivada desde as súas primeiras obras como en E-19, e o seu talento no uso da cor.
Cun personalísimo e expresivo debuxo, La isla (2021) é o seu cómic máis extenso e complexo ata a data, aínda que, en certa medida, poderiamos considerar El lago (2018) como unha antesala da mesma. Nela relata a historia dos habitantes dunha illa que viven baixo a ameaza dunha antiga lenda: un conto de mariñeiros segundo o cal unha grande onda chegará un día para arrasar todo ao seu paso e mergullar os seus fogares na profundidade do océano. Pola súa paisaxe espida, deambulan, con extraordinario sentido do movemento e gran delicadeza, os personaxes que dan vida a esta historia: unha moza que se expón aos límites do seu pequeno mundo, un home que vive aferrado á dor tras unha grave perda e un can que parece a fantasía vivente da lenda da illa
La isla é unha historia poética e inquietante, que xoga coas lendas da tradición dos pobos costeiros, na que Mayte Alvarado, a través do seu rechamante debuxo, explora, con grande acerto, as posibilidades gráficas do medio.
En 2022 gañou o premio á mellor autora emerxente pola ACDCómic e o premio Anteface do Salón do Cómic de Valencia á mellor obra nacional publicada en 2021 por La isla.
2015 – E-19 (El verano del cohete)
2018 – El lago (Spiderland/Snake)
2018 – Descalzos. Los doce apóstoles de México (Centro Estremeño de Estudos e Colaboración con Iberoamérica )
2021 – La isla (Reservoir Books)
PIERRE ALARY
Exposición:
KIOSCO ALFONSO
Charla:
Sábado 13 – 18.15h
Pierre Alary (París, 1970)
Estudou animación na École des Gobelins e traballou durante dez anos nos estudos de animación de Disney en Montreuil, primeiro como asistente e despois como animador. Durante esta etapa participou en películas como Goofy e hijo, El jorobado de Notre Dáme, Hércules, Tarzán ou El emperador y sus locuras.
Iniciouse no mundo do cómic coas edicións Vents d’Ouest en 1993. Baixo o pseudónimo Stanley, colaborou con Didier Crisse en Griffin Dark, l´Alliance. En 2001, creou a serie Les Échaudeurs des Ténèbres para a editorial Soleil.
Desde 2004 ocupouse dos tomos de Belladona -con Ange como guionista-, e que sería a súa primeira obra publicada no noso país. Con todo, a súa confirmación como un autor destacado chegaría da man de Simbad e Silas Corey -co guionista Fabien Nury-. A primeira publicariase de xeito integral, mentres que de Silas Corey publicaríanse dous volumes: La red Aquila e Silas Corey. Todas estas obras publícanse en España por Dibbuks.
Xunto ao guionista de Lincoln, Olivier Jouvray, adaptaría, posteriormente, Moby Dick, o clásico de H. Melville amosando a súa enorme versatilidade.
Máis recentemente, e en solitario, realiza Don Vega, versión libre e primixenia de “El Zorro”, o coñecido personaxe creado por Johnston McCulley. O éxito de crítica e público colleitado por esta obra, en principio unitaria, fixo que o seu autor contemple a posibilidade de realizar novos volumes.
A súa última obra aparecida en España abre a colección de adaptacións realizadas por artistas franceses do soado personaxe Conan o Bárbaro, creado por Robert E. Howard. Con guión do coñecido guionista Morvan, Alary realizaría a adaptación dun dos relatos máis populares do personaxe: A raíña da costa negra.
2007 – Belladona (Dibbuks)
2011 – Simbad. Integral (Dibbuks)
2013 – Silas Corey. 2 volúmenes (Dibbuks)
2014 – Moby Dick (Dibbuks)
2019 – Mi traidor (Dibbuks)
2021 – Don Vega (Nuevo Nueve)
2022 – Conan el Cimmerio. 1 volumen (Planeta Comic)
SERGI SAN JULIÁN
Exposición:
SALA DE EXPOSICIONES PALEXCO
Charla:
Venres 12 – 19.30h
Sergi San Julián (Barcelona, 1973)
De formación autodidacta, Sergi San Julián deuse a coñecer ao gran público con Gorka (Camaleón Edicións), serie de fantasía heroica que iniciou en solitario e continuou coa colaboración de Albert Monteys. Máis tarde, retomou ao personaxe nunha miniserie escrita por Carlos Portela, con Fernando Iglesias (Kohell) realizando os storyboards.
Ao longo dos anos participou en sagas creadas por outros autores: en Fanhunter: Celsquest (Edicións Fanhunter), con guión de Roke González e cor de Oriol San Julián, e en Los Reyes Elfos: Historias de Faerie II (Dolmen), onde debuxou unha historia escrita por Víctor Santos.
Para o mercado francobelga debuxou Interface (Dargaud), con guión de Dominique Latil e cor de Oriol San Julián. E colaborou co guionista Xavier Morell na miniserie Lunita (Amigo Cómics), publicada en EE.UU e editada en España por Unrated Comic.
Traballa de forma habitual coa axencia Comicon, para a que realizou a serie Technomage (Carlsen) con Josep Maria Polls, David Parcerisa e Oriol San Julián. Ademais, colaborou nas cabeceiras Micky Maus e Power Rangers, e creou, xunto a Alexis Capera, The Staff, serie de historietas sobre as vicisitudes da profesión.
A súa obra como humorista gráfico tivo difusión en diversos xornais, revistas de humor e publicacións alternativas: Kale Gorria, Ardi Beltza, Avant, Setmanari de Comunicació Directa, l’Accent ou El Jueves.
Na súa bibliografía ocupa un lugar destacado A conta atrás, novela gráfica escrita por Carlos Portela que por fin se publicou de forma íntegra a cargo de ECC en castelán e galego no vixésimo aniversario do desastre do Prestige.
1999 – Gorka Apócrifo (Planeta Cómic)
2009 – Gorka. El viento de Odei (Dolmen Editorial)
2020 – Lunita. Números 1 a 3 (Unrated Comic)
2021 – La cuenta atrás (ECC)
