Na inauguración das mostras de Palexco, a alcaldesa e o director do festival descubriron as dúas novas figuras que xa forman parte da colección do Viñetas: a da illa remeira Marcopola e a de Dragoneta

Inés Rey: «Viñetas é un proxecto que medra cada ano e transforma a cidade, levando o cómic a museos, salas de exposicións, bibliotecas e espazos públicos»

A Coruña.— Os universos de Marcopola e Os Simpson xa se poden gozar desde este xoves na Coruña. A Sala de Exposicións Municipal Palexco abriulles as súas portas a dúas das mostras máis agardadas dentro da programación de Viñetas desde o Atlántico 2026. As exposicións individuais do autor galego Jacobo F. S. e a colección persoal do internacional Raúl García consolídanse como o grande avance expositivo do certame antes da súa semana central.

A alcaldesa da Coruña, Inés Rey, foi a encargada de inaugurar unha das mostras «estrela» deste Viñetas e que, sen dúbida, será un dos principais focos de atención para o público familiar. Un festival que vén cargado de propostas e iniciativas que converterán a cidade na capital da banda deseñada do Estado este agosto. Na súa intervención a rexedora afirmou que «Viñetas desde o Atlántico non é só unha semana de actividades en agosto, é un proxecto cultural que medra cada ano e que transforma a cidade durante meses, levando o cómic a museos, salas de exposicións, bibliotecas e espazos públicos».

«Estamos ante unha edición de récord, con máis de setenta autores e autoras, decenas de exposicións e máis dun cento de actividades que volverán encher A Coruña de cultura e creatividade. Un festival que este ano pon o foco na memoria social e democrática, demostrando que a banda deseñada é unha ferramenta poderosa para contar historias, reflexionar sobre o pasado e entender mellor o presente», indicou a alcaldesa, quen engadiu que «desde o Goberno municipal temos claro que a cultura non é só entretemento, senón tamén coñecemento, pensamento crítico, memoria e convivencia; e por iso seguimos apostando por un Viñetas aberto, diverso, accesible e conectado coa realidade social do noso tempo».

Pola súa parte, o director do festival puxo o acento na calidade e espectacularidade da montaxe realizada nas instalacións de Palexco. Manel Cráneo amosou a súa confianza en que esta mostra será un polo de atracción para o numerosísimo público familiar que acode ao festival ano tras ano. Nese sentido, destacou a calidade da mostra que recolle a traxectoria artística do recoñecido autor galego Jacobo F. S. desde os seus inicios ata o último número das aventuras de Marcopola e o «gancho» que sen dúbida supón a colección do animador Raúl García, que inclúe unha mostra de orixinais da popularísima serie ‘Os Simpson’.

Durante as súas intervencións, tanto Jacobo F. S. como Raúl García destacaron a importancia de estaren presentes nun festival co prestixio do Viñetas cun espazo desta relevancia.

O universo Marcopola e Os Simpson

A mostra protagonizada polo universo do galego Jacobo F. S. amosa a aposta polos contidos de calidade destinados ao público infantil do Viñetas e permitiralles aos cativos e cativas percorrer o imaxinario persoal e creativo do seu autor, desde os seus primeiros pasos en Os amigos de Archimboldo Roque ata Marcopola, a illa remeira máis famosa da banda deseñada en España, que xa forma parte da colección de figuras do Viñetas, xunto con Dragoneta. A descuberta destas dúas figuras foi un dos eixos do evento.

Todo isto forma parte dunha espectacular posta en escena na que colaborou un grupo de alumnado da EASD Pablo Picasso. Paralelamente, a exposición Un paseo por Springfield. Os Simpson na colección de Raúl García ofrecerá a oportunidade única de desfrutar dunha coidada selección de merchandising, libros icónicos e cómics da universal familia amarela.

A exposición inclúe xoias exclusivas como debuxos orixinais e dedicatorias asinadas polo propio Matt Groening. Cabe destacar que Raúl García, ademais de posuír este valioso arquivo, traballou directamente en varios episodios da serie norteamericana e ostenta o fito de ser o primeiro animador español en formar parte dos estudios Disney.

Un avance de todo o que ofrecerá Viñetas desde o Atlántico 2026

Estas inauguracións en Palexco serven de antesala para a 29.ª edición de Viñetas desde o Atlántico, un festival que este ano se centra na memoria histórica e nas reivindicacións sociais, e cuxa semana principal de actividades se desenvolverá do 10 ao 16 de agosto, expandindo as súas mostras artísticas desde principios de xullo ata finais de setembro.

Baixo un cartel oficial deseñado polo ilustrador galego Miguel Robledo —inspirado en fenómenos astronómicos e na memoria social—, o festival deste ano reafírmase como un dos grandes referentes da novena arte a nivel estatal. Haberá un gran despregamento urbano, con máis de 10 sedes. O evento abandona os recintos únicos para inundar a cidade. Os contidos desta edición distribuiranse en localizacións emblemáticas como o Kiosco Alfonso, o Palacio Municipal de María Pita, a Sala Salvador de Madariaga, a Casa Museo Picasso, a Fundación Luís Seoane e a Casa das Ciencias.

As mostras da Sala Municipal de Exposicións Palexco poderán visitarse de forma gratuíta a partir do 30 de xullo de 12.00 a 14.00 e de 18.00 a 21.00.

O Kiosco Alfonso como escenario do cómic de memoria social

Moi preto, no epicentro do festival, o espazo expositivo do Kiosco Alfonso encherase cunha ampla representación de obras de autores e autoras estatais unidos por un nexo: a memoria democrática e social na España do século XX. Así, os/as visitantes poderán gozar das obras O eco dos días rotos, de Alberto Taracido; Que el fin del mundo nos encuentre bailando e La piel como única bandera, de Sebas Martín; o xa histórico Paracuellos, de Carlos Giménez; Aquí donde estoy, de Tyto Alba e María Castro Hernández, e Caridad del Río, de Pep Brocal.

O programa expositivo completarase coas mostras de Miguel Robledo —autor do cartel desta edición— en María Pita; os premios Castelao na Casa da Cultura Salvador de Madariaga, Elas son fantásticas, autoras galegas de cómic deste xénero, no mesmo espazo; a exposición de ExpoFanzines Autobán, na Biblioteca de Estudios Locais; Stons, de Xulia Pisón, xa inaugurada na Casa Museo María Pita; unha exposición bibliográfica nas Bibliotecas Municipais, Trazos de memoria; e a incorporación da Fundación Luís Seoane como nova sede do festival coa exposición Cómic palestino. Voces propias. Grito colectivo. Cabe destacar a incorporación da Casa Museo Casares Quiroga como sede de mostras vinculadas á memoria histórica, que, nesta ocasión, albergará ‘La guerra civil’, de Paul Preston, mostra que recolle o exitoso traballo de adaptación ao cómic das obras do historiador británico realizada polo autor José Pablo García.

Ademais diso, o Viñetas paralelas de 2026 contará con tres sedes: o Circo de Artesáns, cunha exposición de colectivos de cómic portugueses; o Bar 13, con Óscar Lojo, e El Tranvía, cunha exposición de Fento Studio, ademais da mostra permanente de orixinais de autores de cómic da Pulpeira de Melide.

Máis de 100 actividades para todos os públicos

Especialmente rica é neste Viñetas 2026 a extensa programación de actividades pensadas para todas as idades e intereses e que se distribúen entre as distintas seccións do festival. Máis de 100 propostas, entre as que se contan obradoiros, cine, teatro, charlas, visitas guiadas, gravación de pódcasts e espectáculos radiofónicos, un concerto ilustrado, encontros con autores e autoras, firmas e maratóns de debuxo.

Entre esta axenda destacan a revisión de proxectos profesionais coa colaboración de editoriais e os pódcasts que se gravarán durante a semana do festival, coa colaboración de Campamento Kripton, El diario de Kovacs, Freakland e El Nicho.

Toda a programación pode ser consultada en www.vinetasdesdeoatlantico.com.

Gonzalo Castro destacou a aposta do Goberno de Inés Rey por tecer alianzas entre proxectos culturais e darlle visibilidade ao talento creativo coruñés

A Coruña.— A Casa Museo María Pita acolle desde hoxe a exposición Stons, da ilustradora e autora de banda deseñada coruñesa Xulia Pisón, unha mostra integrada na programación expositiva de Viñetas desde o Atlántico e que forma parte tamén da novena edición do ciclo Elas Son Artistas. A inauguración contou coa participación do concelleiro de Cultura e Turismo, Gonzalo Castro; do director do festival Viñetas desde o Atlántico, Manel Cráneo; da propia artista; e do director artístico e responsable de produción de Elas Son Artistas, Tomi Legido. A xornada completouse cunha actuación musical de MJ Pérez.

A mostra reúne pranchas do novo proxecto autoeditado de cómic de humor de Xulia Pisón e permanecerá aberta ao público ata o vindeiro 27 de setembro. Durante a inauguración, Gonzalo Castro puxo en valor a colaboración entre dous dos programas culturais de referencia da cidade. «Esta confluencia non é simplemente unha suma de programacións. É unha maneira de entender a política cultural, conectando disciplinas, impulsando alianzas e facendo que os proxectos municipais dialoguen entre si para chegar a máis públicos e ofrecer novas oportunidades ás creadoras», sinalou.

O concelleiro destacou tamén o papel de Elas Son Artistas, iniciativa que desde 2018 traballa para reforzar a visibilidade das mulleres creadoras no ámbito cultural, e subliñou a importancia de incorporar a ilustración e a banda deseñada a este espazo de promoción da igualdade. «A igualdade na cultura non consiste unicamente en abrir ocasionalmente unha porta. Consiste en construír condicións de continuidade, recoñecemento, profesionalización e acceso aos espazos de exhibición», afirmou.

Castro salientou ademais a traxectoria de Xulia Pisón, formada na Escola de Arte e Superior de Deseño Pablo Picasso da Coruña e gañadora do primeiro premio do certame Xuventude Crea de Banda Deseñada en 2015. A autora desenvolveu unha carreira que abrangue a ilustración, os fanzines, a divulgación científica e o cómic, con proxectos como Microalgas ou a novela gráfica Irene a porteira, publicada en 2023 xunto ao guionista Óscar Losada. «Xulia non é simplemente unha autora invitada á programación cultural da Coruña. Forma parte da cultura que a cidade produce, da comunidade creativa que debemos acompañar e da xeración que está ampliando as linguaxes da banda deseñada galega», destacou o edil.

A exposición intégrase no programa de Viñetas desde o Atlántico, que desenvolverá a súa semana central entre os días 10 e 16 de agosto, mais que amplía a súa presenza na cidade a través dunha programación expositiva distribuída en diferentes equipamentos culturais municipais.

Neste sentido, o Goberno de Inés Rey continúa apostando por converter as casas museo municipais en espazos dinámicos de creación contemporánea. «Queremos que as Casas Museo sexan espazos vivos, lugares onde a memoria converse coa creación actual, onde o patrimonio se abra a novas miradas e onde artistas e cidadanía poidan encontrarse», lembrou Gonzalo Castro.

A colaboración entre Viñetas desde o Atlántico e Elas Son Artistas reforza a estratexia municipal de promover proxectos transversais que favorezan o encontro entre disciplinas, públicos e creadoras, consolidando A Coruña como unha das principais referencias culturais de Galicia.

O festival bate récord de colaboracións e propostas con un total de 24 entidades que participan nesta edición e máis de 100 actividades

Inés Rey: “O Viñetas axuda a posicionar A Coruña como unha cidade creativa, dinámica e con ambición”

A Coruña.- A alcaldesa da Coruña, Inés Rey, presentou esta mañá a programación da 29ª edición do festival Viñetas desde o Atlántico. Segundo relatou Rey, esta será a edición “máis social e reivindicativa da historia do evento”. Ademais da alcaldesa, tamén participaron o director do festival, Manel Cráneo, e o director xeral de Cultura, Anxo Lorenzo. Acudiu tamén Miguel Robledo, autor do cartel deste ano.

“O Viñetas é moito máis que unha semana en agosto. É un proxecto cultural que se estende durante todo o ano e que axuda a posicionar A Coruña como unha cidade creativa, dinámica e con ambición”, indicou Inés Rey. A alcaldesa tamén reinvidicou a capacidade deste tipo de eventos para crear conciencia: “Desde este Goberno temos claro que a cultura non é só ocio: é unha ferramenta para comprender o mundo e tamén para transformalo. Por iso, este ano o festival pon o foco na memoria social e democrática, usando a banda deseñada para contar historias que nos interpelan como sociedade e que nos obrigan a non esquecer”.

Pola súa banda, o director do festival, Manel Cráneo, quixo facer especial fincapé na relevancia que tiveron no deseño da programación as causas sociais. “Nun momento coma o actual”, subliñou, “o Viñetas aposta pola banda deseñada como medio de transformación da sociedade na que vivimos e por iso a memoria social atravesará varias das exposicións, dende as experiencias das loitas sociais e a Guerra Civil española ata a mostra de autores e autoras palestinos na Fundación Luis Seoane, que se incorpora como sede do festival”. Neste sentido, Cráneo destacou que o Viñetas 2026 bate o récord de entidades colaboradoras cun total de 24, que inclúen, dende institucións como os Museos Científicos ata asociacións como Autobán, CUAC FM ou Amigos de la Ópera de A Coruña, festivais como Elas son artistas, organizacións como Amnistía Internacional, fundacións como Al Fanar e podcasts como El Nicho, de David Perdomo.

Como colofón a estas colaboracións, no mes de maio Viñetas contou cun grupo de oito alumnos e alumnas de prácticas da escola Pablo Picasso na área de deseño artístico das exposicións de Kiosco Alfonso e Palexco. Esta selección de alumnado contará tamén cun “showroom” o domingo 16 de agosto para poder mostrar os seus traballos. Esta colaboración consolida o compromiso de Viñetas desde o Atlántico de integrar ás novas xeracións no tecido profesional e darlles unha oportunidade para entrar en contacto co mercado.

Na rolda de prensa presentouse a que será unha edición “histórica” do festival en moitos sentidos. En primeiro lugar, por coincidir coa eclipse total que se producirá o día 12 de agosto, pero tamén polas súas cifras e pola relevancia dos seus protagonistas. Máis de 70 autores e autoras pasarán pola Coruña entre os días 10 e 16 de agosto para participar en 24 exposicións e unha ampla programación de máis de 100 propostas entre as que se contan obradoiros, charlas, clases maxistrais, podcasts, espectáculos en directo, visitas guiadas e actividades pensadas para toda a cidadanía -dende pequenos ata adultos- e para público especializado.

Viñetas desde o Atlántico mantén en 2026 as súas principais seccións que acompañan aos visitantes na súa experiencia no festival: Viñetas Expo; Viñetas Mini, con obradoiros diarios para público infantil, unha proxección cinematográfica e unha proposta teatral; Viñetas Show, cun concerto ilustrado, dúas proxeccións, unha obra teatral e dúas xornadas dedicadas a podcasts especializados de Galicia, Madrid e Cataluña; Viñetas Pro, con dúas clases maxistrais e unha sesión de revisión de proxectos para autores/as; un encontro e dúas expos para Viñetas inclusivas e a extensa programación de Rúa BD que contará con 38 casetas entre as que figuran as de 18 editoriais procedentes de todo o estado presentando novidades e dinamizando este espazo vital do festival. Pero ademais, en 2026 incorpórase a nova sección que quere poñer en valor o traballo da Bibliotecas Municipais da Coruña arredor da banda deseñada, Viñetas Biblio.

Os Simpsons e Marcopola enchen Palexco

Na presentación desvelaron os detalles da que será unha intensa programación de exposicións que se iniciará no mes de xullo coas inauguracións de tres das mostras máis relevantes desta edición. Para abrir a edición, e da man da colaboración dos Museos Científicos Coruñeses, a eclipse adiántase nas viñetas máis artísticas na expo Eclipse de viñetas, na que dez autoras e autores locais (Xulia Pisón, Diego Burdío, Paula Esteban, Uxía Larrosa, Xulia Vicente, Jorge Peral, Marcos Calo, Luis Yang e Paula Mayor, con Jordi Bayarri como autor convidado) reinterpretarán dende a súa mirada a historia científica e artística das eclipses.

Tamén no mes de xullo chegará o momento de abrir as portas dun dos recintos que máis público recibe sempre no Viñetas; Palexco será a sede das mostras de Jacobo Fernández e da colección de Raúl García. Na primeira delas percorreremos o universo persoal do creador da illa remeira máis coñecida da banda deseñada en España, mentres que na exposición Un paseo por Springfield. Os Simpsons na colección de Raúl García, teremos o privilexio de achegármonos a unha mostra de merchandising e libros dos cómics da famosa serie, con algúns debuxos orixinais e dedicatorias do propio Matt Groening. Raúl García traballou en varios capítulos da serie norteamericana e foi o primeiro animador español en traballar para Disney.

O Kiosco Alfonso como escenario do cómic de memoria social

Xusto a carón, no epicentro do festival, o espazo expositivo do Kiosco Alfonso encherase counha ampla representación de obras de autores e autoras estatais unidos por un nexo: a memoria democrática e social na España do século XX. Así, os/as visitantes poderán desfrutar das obras O eco dos días rotos, de Alberto Taracido; Que el fin del mundo nos encuentre bailando e La piel como única bandera, de Sebas Martín; o xa histórico Paracuellos, de Carlos Giménez; Aquí donde estoy, de Tyto Alba e María Castro, e Caridad del Río, de Pep Brocal.

O programa expositivo completarase coas mostras de Miguel Robledo -autor do cartel desta edición- en María Pita; os premios Castelao na Casa da Cultura Salvador de Madariaga, Elas son fantásticas, autoras galegas de banda deseñada deste xénero, no mesmo espazo; a exposición de ExpoFanzines de Autobán, na Biblioteca de Estudos Locais; Ston, de Xulia Pisón, na Casa Museo María Pita; unha exposición bibliográfica nas Bibliotecas Municipais, Trazos de memoria, e a incorporación da Fundación Luis Seoane como nova sede do festival coa expo Cómic palestino. Voces propias. Grito colectivo. Cómpre destacar a incorporación da Casa Museo Casares Quiroga como sede de mostras vencelladas á memoria histórica que, nesta ocasión albergará ‘La guerra civil’ de Paul Preston, mostra que recolle o exitoso traballo de adaptación á banda deseñada das obras do historiador británico realizada polo autor José Pablo García.

Ademais diso, o Viñetas paralelas de 2026 contará con tres sedes: o Circo de Artesáns, cunha expo de colectivos de banda deseñada portugueses, o Bar 13, con Óscar Lojo e Tranvía, con unha exposición de Fento Studio.

Máis de 100 actividades para todos os públicos

Especialmente rica é neste Viñetas 2026 a extensa programación de actividades pensadas para todas as idades e intereses e que se distribúen entre as distintas seccións do festival. Más de 100 propostas entre as que se contan obradoiros, cine, teatro, charlas, visitas guiadas, gravación de podcasts, espectáculos radiofónicos, un concerto ilustrado, encontros con autores e autoras, sinaturas e maratóns de debuxo.

Entre esta apertada axenda destacan, a revisión de proxectos coa colaboración de editoriais, con convocatoria xa aberta a través dun formulario para calquera debuxante interesado/a, e os podcasts que se gravarán durante a semana do festival coa colaboración de Campamento Kripton, El diario de Kovacs, Freakland e El Nicho.

Quedan aínda por coñecer algúns nomes de autores e autoras internacionais protagonistas do Viñetas 2026 que se desvelarán ao longo do mes de xullo. Neste sentido, o director do evento, Manel Cráneo, amosou a súa confianza en poder dar aínda algunhas “sorpresas moi potentes” para pechar o cartel artístico desta 29ª edición.

Toda a programación pode ser consultada en www.vinetasdesdeoatlantico.com.

Calquera creador de banda deseñada pode enviar os seus proxectos para o proceso de selección

A Coruña.- A edición 29ª do festival Viñetas desde o Atlántico recupera unha proposta que xa tivo grande éxito en 2024 e 2025. Trátase da revisión de portfolios por parte de profesionais de diferentes editoriais. É unha oportunidade única para que creadores e creadoras de banda deseñada poidan presentar o seu traballo a varias firmas editoras e acadar ademais feedback por parte dos seus responsables.

Para participar non é necesario ser profesional, nin ter unha formación determinada, non existe límite de idade, nin é necesario ser da Coruña. Trátase dunha convocatoria totalmente aberta ao talento na banda deseñada.

Tamén no caso concreto de proxectos que se presenten e que todavía necesiten dun traballo para poder ser presentados para a súa publicación, haberá unha mentoría profesional.

Para participar na fase de selección previa que permitirá acceder á convocatoria, é necesario cubrir o formulario que atoparedes aquí debaixo e remitir como mínimo un proxecto de banda deseñada(sinopse, presentación de personaxes, unha mostra das páxinas). O prazo para participar remata o 17 de xullo ás 14.00 horas.

- Inscríbete aquí -

A revisión dos portfolios será un dos eventos incluídos na programación oficial do Viñetas Pro, dentro do Viñetas 2026, e terá lugar o xoves, 13 de agosto, de 10.00 a 13.00 horas nun dos espazos colaboradores do festival, o Circo de Artesáns.