Ademais, A Coruña amenceu esta mañá coas emblemáticas figuras do festival xa colocadas nos Xardíns de Méndez Núñez e no Kiosco Alfonso e ao longo desta xornada quedarán todas instaladas nos seus espazos habituais
Como novidade neste 2023, en homenaxe á figura de Francisco Ibáñez, as figuras de Mortadelo e Filemón situaranse na entrada do Kiosco Alfonso
A Coruña, 4 de agosto de 2023.- Máis de 30 autoras e autores de referencia do mundo da banda deseñada asinarán os seus libros en Viñetas desde o Atlántico 2023. Deste xeito, esta 26º edición do festival internacional do cómic da cidade da Coruña contará coas súas xa tradicionais sinaturas na Rúa da BD, programadas polas editoras e librarías presentes na feira. Ademais, as autoras e os autores das exposicións que conforman o cartel este 2023 asinarán as súas obras durante o transcurso do festival. Entre as autorías presentes nas firmas cítanse nomes como os de Laura Pérez Vernetti, Isa Feu, Marta Guerrero, Marika Vila, Elisa McCausland, Teresa Radice, Stefano Turconi, David Rubín, Emma Ríos, Xulia Vicente, Paula Cheshire, Santy Gutiérrez, Manel Cráneo e Brais Fierro, entre moitos outros. A axenda completa de sinaturas pódese consultar na sección web SINATURAS.
FIGURAS DE CÓMIC A TAMAÑO REAL
A Coruña amenceu esta mañá coas emblemáticas figuras do festival xa colocadas nos Xardíns de Méndez Núñez e no Kiosco Alfonso. Ao longo desta xornada quedarán todas instaladas nos seus espazos habituais, cunha novidade este ano: en homenaxe a Francisco Ibáñez, as figuras de Mortadelo e Filemón situaranse na entrada do Kiosco Alfonso, o centro neurálxico da celebración do festival. Entre estas personaxes de historieta a tamaño real, xa míticas da cidade da Coruña, non faltan nomes como Batman, Pitufina, Capitán Trueno, Torpedo, Joker, Spider-Man, Corto Maltés, Súper López ou Tintín, entre outras.
